اغترب .. قاعد ع طرف الشباك
قدامو بحر .. عجئة ناس
قدامو .. حياة منسية بـ سوريا
وقدامو كمان ..
في ورقة بيضا
وقلم أسود
شكلو عم يكتب رسالة .. النص بيقول:
……………………………………………
السلام عليكم .. أما بعد

بتزكر هداك اليوم ..
وقت كان عزرائيل بمدينتنا
دخان كتير
اصوات كتير
اخواتي واهلي عم يركضوا حواليي
امي ضبت تياب اخواتي الصغار
ابي ضب الاوراق المهمة
أنا ضبيت حالي .. ووقفت عند الباب
ابو احمد صاحب البقالية
فاتح بقاليتو .. ومتسطح قدامها
من نص ساعة ..
القناصة اشترت روحو
وهداك ابنو سعيد ..
اجا لـ يشحط ابوه عالبيت
وليكو ابنن الصغير
عم يبكي .. ما بيعرف شبو ابوه
اهلي طلعوا ..
قالوا يلا بسرعة .. اركضوا
ما استوعبت .. اجيت لـ سكر الباب
صرخ ابي .. اتركووو هلأ واركوض
ركضت .. ركضنا .. هربنا
وصلنا ..
وصلنا ع مكان آمن
برا الحارة
برا المدينة
برا البلد
براتك يا سوريا ..
تركتك أنا ..
صرتي عم تموتينا
لما ولادك موتوكي
وغربونا ..
انتي غريبة لـ حالك
وأنا غريب .. مع سكان البلد الجديد
بالنهاية بدي قلك
انتبهي ع حالك
إن لـ عودتي .. موعد
وقولي لـ سعيد إنو ابوه بقلوبنا
وقليلو جارك ما تركك .. راجعلو
والحنين .. دبحنا
متلو متل هالحرب
أستودعك الآن .. إلى اللقاء

You are not authorized to see this part
Please, insert a valid App IDotherwise your plugin won't work.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *